tamām marhala-e-fard-o-zāt honā hai
salīb chaḌhne se pahle salīb Dhonā hai
hazār baar yazīdoñ se sāmnā hogā
hazār baar mujhe yuuñ hī qatl honā hai
abhī vo dāġh-e-garebāñ pe tabsira na kare
abhī to ḳhud use sābun se haath dhonā hai
sulagtī aag ke jañgal kā ik shajar huuñ maiñ
mirā vajūd yaqīnan sarāb honā hai
hamāre log asīrān-e-sho.abada-bāzī
hamāre shahr meñ dānish-varī kā ronā hai
ye jins-e-jāñ ki abhī rā.egāñ nahīñ 'mohsin'
kured paao to miTTī tamām sonā hai