ajiib chiiz mohabbat kī vārdāt bhī hai
hadīs-e-dil bhī hai rūdād-e-kā.enāt bhī hai
obūdiyat to hamārā hai sheva-e-fitrī
agar ḳhudā.ī kareñ ham to koī baat bhī hai
idhar bhī uThtī hai arbāb-e-anjuman kī nazar
kuchh aap hī nahīñ mahfil meñ merī zaat bhī hai
mire vajūd se nā-mumkināt kā aalam
mire vajūd se duniyā-e-mumkināt bhī hai
ye irtiqā-e-bashar kī hai kaun sī manzil
ki is kī zad meñ ḳhudā bhī hai kā.enāt bhī hai