vo shāḳh-e-gul ki jo āvāz-e-andalīb bhī thī

huī jo ḳhushk to mere liye salīb bhī thī

dayār-e-sañg meñ sar phoḌtī phirī barsoñ

mirī sadā ki jo is daur kī naqīb bhī thī

jo sham.a duur thī us ne faqat dhuāñ hī diyā

usī kī lau se jalā huuñ jo kuchh qarīb bhī thī

sarisht-e-husn ajab hai ki vasl ke hañgām

nigāh-e-yār meñ kaifiyyat-e-raqīb bhī thī

sakūñ kahāñ ki maiñ āshob-e-fikr rakhtā huuñ

jo mahr thā to tamāzat mirā nasīb bhī thī