har naqsh havā ho ke bikhar jā.egā āḳhir
'ḳhālid' tirā ehsās bhī mar jā.egā āḳhir
miT jā.egā ḳhvāhish kā nishāñ maut ke hāthoñ
ye saañp bhī siine se utar jā.egā āḳhir
din jis ke liye raat baḌe karb meñ kaaTī
sāyoñ ke ta.āqub meñ guzar jā.egā āḳhir
maiñ ḳhauf huuñ baiThā huuñ kamīñ-gāh-e-fanā meñ
tū bach ke mirī zad se kidhar jā.egā āḳhir
jo saa.e ke mānind ravāñ hai mire hamrāh
vo shaḳhs bhī tanhā mujhe kar jā.egā āḳhir