ik nazar muḌ ke mujhe dekh ai jaane vaale
ye jo lamhe haiñ kabhī phir nahīñ aane vaale
kitnī pākīza jagah hai ki jahāñ par logoñ
ahl-e-maqtal haiñ mirī laash jalāne vaale
ġham-e-daurāñ ke masā.ib kā mudāvā kyā hai
ishq bas ishq batāte haiñ batāne vaale
yahī sab log haiñ un sab ne mirā qatl kiyā
ye mirī qabr ko phūloñ se sajāne vaale
maiñ ne ye baat bahut der se jaanī 'fahmī'
saare va.ade nahīñ hote haiñ nibhāne vaale