din bhar jaane kis kis se ye miltā hai
jism hamārā shaam ko tanhā rahtā hai
tasvīreñ hairat se dekhā kartīñ haiñ
kamra mujh se jaan chhuḌāyā kartā hai
saarī ummīdeñ mujh ko beva lagtīñ haiñ
lagtā hai saare jag meñ añdhiyārā hai
jab bhī husn chaman meñ dekhā kartā huuñ
sar merā ye bhārī hotā jaatā hai
jis mūrat ko dekh rahe haiñ sab ke sab
maiñ ne hī ye patthar aaj tarāshā hai
ek hī ḳhvāb to maiñ ne dekhā thā yaaro
ḳhvāb koī sadiyoñ tak chaltā rahtā hai
duniyā mujh ko pāgal pāgal kahtī hai
ab maiñ pāgal ho jā.ūñgā lagtā hai
āñkhoñ ko tālāb banā kar ke apnī
ik banjāra saaya dekhā kartā hai