pas-ġhubār-e-havas raat Dhaltī rahtī hai
nashe meñ chuur pighaltī machaltī rahtī hai
ḳhabar yahī hai ki āġhosh-e-hijr meñ pahroñ
tumhārī yaad bhī pahlū badaltī rahtī hai
ye maiñ ne dekhā hai akasr phaTī purānī hayāt
sar-e-darīcha-e-shab haath maltī rahtī hai
qafas se ham bhī nikalne ko kab se haiñ be-tāb
magar vo sā.at-e-āḳhir jo Taltī rahtī hai
vo rañg rañg bahārāñ hai khultā rahtā hai
vo shāḳh shāḳh samar-var hai phaltī rahtī hai
hai ek kār-e-ziyāñ shahr shahr dar-badarī
magar yahī ki tabī.at bahaltī rahtī hai