ye khel bhūl-bhulayyāñ meñ ham ne khelā bhī
tirī talāsh bhī kī aur ḳhud ko DhūñDā bhī
mirā nasīb thī hamvār rāste kī thakan
mirā harīf pahāḌoñ pe chaḌh ke utrā bhī
ye aarzū thī ki yak-rañg ho ke jī letā
magar vo aañkh jo shaitāñ bhī hai farishta bhī
samundaroñ se guhar kab ke ho ga.e nāpaid
bhañvar ke saath maiñ gahrā.iyoñ meñ utrā bhī
barahnagī pe bhī guzrā qabā-e-zar kā gumāñ
libās par huā juzv-e-badan kā dhokā bhī
garajne vaale baraste nahīñ ye sunte the
guzishta raat vo garjā bhī aur barsā bhī