ruḳhsat-e-shām hai aur va.ade kā saaya bhī nahīñ

ab takalluf na karūñ jā ke taqāzā ho jā.ūñ

kab se huuñ maahī be aab zamāne kī tarah

koī nekī ho tire paas to dariyā ho jā.ūñ

kitne pechīda masā.il kī thakan hai mujh meñ

ik zarā soch luuñ tujh ko tar-o-tāza ho jā.ūñ

kitne pahlū haiñ ka.ī rañg chhupe haiñ mujh meñ

abhī aisā huuñ jo tū chāhe to vaisā ho jā.ūñ

apne siine meñ haiñ Thahrī huī sāñseñ kab se

zalzala ban ke to aa maiñ tah-o-bālā ho jā.ūñ

vo rifāqat pe razā-mand nahīñ hai to na ho

kyā maiñ us shaḳhs ke hote hue tanhā ho jā.ūñ

be-yaqīnī hai kuchh imroz meñ itnī 'maz.har'

jī meñ aatā hai ki andesha-e-fardā ho jā.ūñ