na.e makāñ meñ aqīde kī koī jā hī nahīñ
ḳhudā to hai pa kahīñ banda-e-ḳhudā hī nahīñ
bharosa yuuñ to bahut thā magar duā ke liye
jo haath ham ne uThāyā to vo uThā hī nahīñ
har ek shaḳhs yahāñ apne-āp meñ gum hai
kisī se haath milāne kā fā.eda hī nahīñ
lahū-luhān hai jo bhī udhar se aayā hai
magar ye maiñ ki jo us raah tak gayā hī nahīñ
dayār-e-ḳhvāb hai aao yahīñ qayām kareñ
yahāñ se yuuñ bhī nikalne kā rāsta hī nahīñ