apne riste hue zaḳhmoñ kī qabā laayā huuñ
zindagī merī taraf dekh ki maiñ aayā huuñ
kisī sunsān jazīre se pukāro mujh ko
maiñ sadāoñ ke samundar meñ nikal aayā huuñ
kaam aa.ī hai vahī chhāñv ghanī bhī jo na thī
vaqt kī dhuup meñ jis vaqt maiñ kumhlāyā huuñ
ḳhairiyat pūchhte haiñ log baḌe tanz ke saath
jurm bas ye hai ki ik shoḳh kā ham-sāya huuñ
sub.h ho jaa.e to us phuul ko dekhūñ ki jise
maiñ shabistān-e-bahārāñ se uThā laayā huuñ
asr-e-nau mujh ko nigāhoñ maiñ chhupā kar rakh le
ek miTtī huī tahzīb kā sarmāya huuñ