milte nahīñ haiñ jab hameñ ġham-ḳhvār ek do
phirte haiñ haath meñ liye aḳhbār ek do
shorīdgi-e-sar ko maiñ ro.ūñgī tā-ba-kai
lā kar mujhe bhī de koī dīvār ek do
āñkhoñ meñ lā ke dekh tabassum kī raushnī
jiite haiñ terī chashm ke bīmār ek do
samjho hai ḳhush-nasīb vo saare jahān meñ
laa.e jo DhūñD kar koī ġham-ḳhvār ek do
phirte haiñ miir ḳhaar koī pūchhtā nahīñ
ġhālib bhī bikte haiñ sar-e-bāzār ek do
mānūs ġham se ḳhud ko 'sadaf' kar ke jī zarā
har har qadam pe haiñ pa.e āzār ek do