is dhuup se kyā gila hai mujh ko
saa.e ne jalā diyā hai mujh ko
maiñ nāla-e-sukūt sañg kā huuñ
sahrā ne bahut sunā hai mujh ko
maiñ lafz kī tarah be-zabāñ thā
ma.anī ne adā kiyā hai mujh ko
har sach kā nasīb sañg-sārī
aur sach hī se vāsta hai mujh ko
ḳhā.if nahīñ marg-e-nā-gahāñ se
siine kā vo hausla hai mujh ko
patthar pe mirī sadā kā saaya
ā.īna dikhā rahā hai mujh ko
āvāz de mujh ko tīrgī meñ
āvāz hī naqsh-e-pā hai mujh ko