kisī ḳhayāl kī rau meñ thā muskurāte hue

magar vo chauñk paḌā thā nazar milāte hue

chamak thī ik pas-e-dīvār sā.iqa-bar-dosh

ki taaq o dar the shab-e-māh meñ nahāte hue

magar navishta-e-dīvār lā-zavālī hai

zamāna karvaTeñ letā hai aate jaate hue

kabhī kabhī koī lamha bhī jāvedānī hai

guzar ga.iiñ ka.ī sadiyāñ yahī sunāte hue

jo rah gayā thā kahīñ ik sahāb-e-nā-rafta

bikhar ke ḳhaak huā paañv laḌkhaḌāte hue

maiñ Dagmagāyā to sāhil kā thā na maujoñ kā

chamak rahī thī nadī āsmāñ uḌāte hue

zarā sī raushnī phūTī to sub.h-dam sūraj

fazā meñ Duub gayā āstīñ chaḌhāte hue

koī kisī kā nahīñ is sarā-e-fānī meñ

koī charāġh bujhā ye sadā lagāte hue