ranj-e-duniyā ho ki rañj-e-āshiqī kyā dekhnā

saarī ḳhushiyāñ hairateñ sab ek sī kyā dekhnā

baaġh bāzār-e-tamāshā aañkh jūyā-e-bahār

chashm-e-nargis yā tan-e-sarv-e-sahī kyā dekhnā

dekhnā kyā ek hī shai sū-e-bātin dekhiye

be-hisī be-chehragī be-manzarī kyā dekhnā

saaz meñ bālā-e-naġhma aur āvāzeñ bhī haiñ

ik sharār-e-naġhmagī āvāz kī kyā dekhnā

rāh-e-sahrā hai na aatī hai kahīñ fasl-e-bahār

ishq meñ dīvāngī jāma-darī kyā dekhnā

mushkiloñ meñ kaam aa jaatī hai āshufta-sarī

ai junūñ-sāmān-e-kār-e-āgahī kyā dekhnā

jab use dekhā to jī chāhā ki dekhā hī karūñ

sochtā ye thā ki nāz-e-dilbarī kyā dekhnā