hai kis ke liye lutf ġhazab kis ke liye hai
ye zābta-e-nām-o-nasab kis ke liye hai
mere liye afsurdagi-e-naḳhl-e-tamannā
ye silsila-e-tāk-e-tarab kis ke liye hai
sach par jo yaqīñ hai to use kyuuñ nahīñ kahte
āḳhir ye zabāñ mohr-ba-lab kis ke liye hai
hai jis pe mohabbat kī nazar hogā pareshāñ
ai sāna-e-gul hijr kī shab kis ke liye hai
jab dil ko ta.alluq na rahā kū-e-sanam se
ye kashmakash-e-tark-o-talab kis ke liye hai
is kār-e-nazar ne kiyā taqdīr kā qaa.il
shab kis ke liye hāsil-e-shab kis ke liye hai