tasalsul pā.emālī kā milegā
sarīr-ārā ḳhizāñ hai kyā milegā
chalo dushman ko siine se lagā leñ
kahāñ is shahr meñ apnā milegā
ḳharāba hai ki dasht-e-nainavā hai
koī zaḳhmī koī pyāsā milegā
mire lashkar kī miTTī dūsrī hai
saf-e-a.adā meñ vo bhī jā milegā
nahīñ be-vaj.h is girdāb meñ huuñ
kanār-e-āb bhī dariyā milegā
nahīñ be-sūd nāze-e-ġham uThānā
hisāb-e-dard hai duunā milegā
'amīn'-ashraf kī hai pahchān ye bhī
bharī mahfil meñ vo tanhā milegā