rūThnā chāho to ab hargiz manāne kā nahīñ

dil ko maa.il kar liyā aañsū bahāne kā nahīñ

rāste dhuñdlā ga.e haiñ raushnī vaalo suno

va.ada jalne kā kiyā thā TimTimāne kā nahīñ

kashtiyāñ mañjdhār meñ haiñ nāḳhudā nārāz haiñ

āsmānoñ se kaho bijlī girāne kā nahīñ

kab Dhalegī shām-e-ġham kab ḳhatm hogā zulm-o-jabr

zindagī insāñ kī hai unvāñ fasāne kā nahīñ

lo chale jaate haiñ ḳhālī haath duniyā se 'umīd'

yaad kar lenā azīzo bhuul jaane kā nahīñ