mumkin hī nahīñ ki kinārā bhī karegā

āshiq hai to phir ishq dobāra bhī karegā

pardes meñ aayā huuñ to kuchh maiñ bhī karūñgā

kuchh kaam mire taḳht kā taarā bhī karegā

andāz yahī hai yahī atvār haiñ us ke

baiThegā bahut duur ishāra bhī karegā

ro.egā kabhī ḳhuub kabhī hañsegā

kyā aur tire tiir kā maarā bhī karegā

jab vaqt paḌā thā to jo kuchh ham ne kiyā thā

samjhe the vahī yaar hamārā bhī karegā

sheroñ meñ 'hilāl' aap ko kahnā hai faqat sach

sach baat magar koī gavārā bhī karegā