aag hai phailī huī kaalī ghaTāoñ kī jagah

bad-duā.eñ haiñ laboñ par ab duāoñ kī jagah

intiḳhāb-e-ahl-e-gulshan par bahut rotā hai dil

dekh kar zāġh-o-zaġhan ko ḳhushnavāoñ kī jagah

kuchh bhī hotā par na hote pāra-pāra jism-o-jāñ

rāhzan hote agar un rahnumāoñ kī jagah

luT ga.ī is daur meñ ahl-e-qalam kī aabrū

bik rahe haiñ ab sahāfī be-savāoñ kī jagah

kuchh to aatā ham ko bhī jaañ se guzarne kā maza

ġhair hote kaash 'jālib' āshnāoñ kī jagah