is shahr-e-ḳharābī meñ ġham-e-ishq ke maare
zinda haiñ yahī baat baḌī baat hai pyāre
ye hañstā huā chāñd ye pur-nūr sitāre
tābinda o pā.inda haiñ zarroñ ke sahāre
hasrat hai koī ġhuncha hameñ pyaar se dekhe
armāñ hai koī phuul hameñ dil se pukāre
har sub.h mirī sub.h pe rotī rahī shabnam
har raat mirī raat pe hañste rahe taare
kuchh aur bhī haiñ kaam hameñ ai ġham-e-jānāñ
kab tak koī uljhī huī zulfoñ ko sañvāre