tum se pahle vo jo ik shaḳhs yahāñ taḳht-nashīñ thā
us ko bhī apne ḳhudā hone pe itnā hī yaqīñ thā
koī Thahrā ho jo logoñ ke muqābil to batāo
vo kahāñ haiñ ki jinheñ naaz bahut apne ta.iiñ thā
aaj so.e haiñ tah-e-ḳhāk na jaane yahāñ kitne
koī shola koī shabnam koī mahtāb-jabīñ thā
ab vo phirte haiñ isī shahr meñ tanhā liye dil ko
ik zamāne meñ mizāj un kā sar-e-arsh-e-barīñ thā
chhoḌnā ghar kā hameñ yaad hai 'jālib' nahīñ bhūle
thā vatan zehn meñ apne koī zindāñ to nahīñ thā