ghar ke zindāñ se use fursat mile to aa.e bhī
jāñ-fazā bātoñ se aa ke merā dil bahlā.e bhī
lag ke zindāñ kī salāḳhoñ se mujhe vo dekh le
koī ye paiġhām merā us talak pahuñchā.e bhī
ek chehre ko tarastī haiñ nigāheñ sub.h o shaam
zau-fishāñ ḳhurshīd bhī hai chāñdnī ke saa.e bhī
siskiyāñ letī havā.eñ phir rahī haiñ der se
āñ.suoñ kī rut mire ab gulistāñ se jaa.e bhī
roz hañstā hai salīboñ se udhar māh-e-munīr
us ke pīchhe kaun hai vo chhab mujhe dikhlā.e bhī