shu.ūr-e-zāt ke sāñche meñ Dhalnā chāhtā huuñ
maiñ girne se bahut pahle sambhalnā chāhtā huuñ
libās-e-ādam-e-ḳhākī badalnā chāhtā huuñ
maiñ apne jism se bāhar nikalnā chāhtā huuñ
tumhārī yaad kī bārish meñ jalnā chāhtā huuñ
maiñ sañg-o-ḳhisht huuñ lekin pighalnā chāhtā huuñ
mire andar ḳhazāne haiñ ugalnā chāhtā huuñ
tah-e-pātāl ko chhū kar uchhalnā chāhtā huuñ
mujhe pīchhe nahīñ rahnā hai jiine kī tamannā
husain ibn-e-alī ke saath chalnā chāhtā huuñ