chashm-o-dil sāhab-e-guftār hue jaate haiñ
rāste aql ko dushvār hue jaate haiñ
hijr-e-derīna se ab ḳhush the bahut maiñ aur vo
ab magar fāsle bezār hue jaate haiñ
vo nigāheñ haiñ muġhannī kī thiraktī poreñ
saaz so.e hue bedār hue jaate haiñ
sher-goī tirā mansab to nahīñ tifl-e-suḳhan
haañ magar hijr meñ do chaar hue jaate haiñ
nisbat-e-abjad-e-kirdār na thī jin ko 'na.īm'
sāhab-e-azmat-e-kirdār hue jaate haiñ