jism taaza gulāb kī sūrat
zindagī ik nisāb kī sūrat
naqsh haiñ ab varaq varaq dil par
chand yādeñ kitāb kī sūrat
vo mire paas hai nahīñ bhī hai
ik haqīqat sarāb kī sūrat
dard us se bayāñ karūñ kaise
jaise māhī-be-āb kī sūrat
mai-kade meñ agar nahīñ kuchh to
zahr de de sharāb kī sūrat
husn-e-jānāñ kā haal kuchh yuuñ hai
chāñd Dhalte shabāb kī sūrat
gar vo pūchheñge hāl-e-dil 'zākir'
kuchh nahīñ hai javāb kī sūrat