mohabbat kī havā-e-dil-rubā se jhuuT bolegī
hasīñ kāzib hai vo ahl-e-vafā se jhuuT bolegī
vo ik ik jhuuT jhuTlāne ko sau sau jhuuT bolegī
vo ḳhud se jhuuT bolegī ḳhudā se jhuuT bolegī
mire ma.asūm sach ko kach.harī meñ lā khaḌā kar ke
koī dekhe ki vo kis kis adā se jhuuT bolegī
usī ke jhuuT se girdāb meñ us kā safīna hai
magar ulTā vo apne nā-ḳhudā se jhuuT bolegī
ye maanā sub.h-e-sādiq ko kare vo jhuuT se tauba
usī pal vo magar bād-e-sabā se jhuuT bolegī
ajab kyā jo use ho jaa.e umr-e-jāvedāñ hāsil
jo vo shīrīñ-dahan apnī qazā se jhuuT bolegī