jin añkhḌiyoñ meñ na thā kuchh sharāratoñ ke sivā
un añkhḌiyoñ meñ nahīñ kuchh bhī hasratoñ ke sivā
laboñ pe mauj-e-tabassum kā ahd biit gayā
laboñ pe aaj nahīñ kuchh shikāyatoñ ke sivā
vo anjuman kā tasavvur kare to kaise kare
jise nasīb na ho kuchh bhī ḳhalvatoñ ke sivā
ik aa.ina huuñ junūn-o-ḳhirad kā ā.īna
mirī nazar meñ nahīñ kuchh bhī hairatoñ ke sivā
usī se pūchh mire intizār kā aalam
jise na kuchh bhī mayassar ho fursatoñ ke sivā
gudāz-e-sāġhar-o-paimāna kaun samjhā hai
mire sivā mire dil kī nazākatoñ ke sivā
kamī usī meñ tamannā.eñ jalva-gar thiiñ 'kamāl'
kuchh aaj dil meñ nahīñ hai jarāhatoñ ke sivā