maiñ sahrā thā jazīra ho gayā huuñ
samundar dekh terā ho gayā huuñ
ba-juz ik naam kahtā huuñ na suntā
maiñ aisā gūñgā bahrā ho gayā huuñ
tirī āñkhoñ ne dhoyā hai mujhe yuuñ
maiñ bilkul sāf-suthrā ho gayā huuñ
tū sūraj hai maiñ ā.īne kā TukḌā
kiran chhū kar sunahrā ho gayā huuñ
mujhe raushan kiye hai aks terā
maiñ terā shoḳh chehra ho gayā huuñ
baḌī lazzat hai terī qurbatoñ meñ
tar-o-tāza saverā ho gayā huuñ