ġham diye haiñ to masarrat ke guhar bhī denā

ai ḳhudā tū mujhe jiine kā hunar bhī denā

hākim-e-vaqt ye hijrat mujhe manzūr magar

dam-e-ruḳhsat mujhe sāmān-e-safar bhī denā

ai shab-o-roz ke mālik mujhe is duniyā meñ

lailatul-qadr kī mānind sahar bhī denā

sun zarā ġhaur se sun ai shajar-e-sāya-fagan

jab tire saa.e meñ pahuñchūñ to samar bhī denā

lafz nikleñ jo zabāñ se to diloñ tak pahuñcheñ

merī taqrīr meñ kuchh aisā asar bhī denā

tere altāf-o-karam kī hai bahar-sū shohrat

māl-o-zar degā hī to la.al-o-gohar bhī denā

tū jo shamshīr-ba-kaf ho to maiñ sar pesh karūñ

jo haiñ dil vaale unheñ aatā hai sar bhī denā

baḳhshne vaale zamāne ko jamāl-e-har-rañg

jo tujhe dekh sake aisī nazar bhī denā

le chalā maiñ tirī jannat se bayābāñ kī taraf

sar chhupāne ko vahāñ tū mujhe ghar bhī denā

harf aa jaa.e na tujh par kahīñ kam-zarfī kā

dāman-e-'shams' ko tū dīda-e-tar bhī denā