manzar-e-ḳhema-e-shab dekhne vaalā hogā
vo charāġhoñ ko bujhā.egā ujālā hogā
sharbatī āñkhoñ meñ kājal vo lagā.egā abhī
raat kā rañg abhī aur bhī kaalā hogā
mujh ko Thahre hue sāhil se nahīñ thī ummīd
mujh ko bahte hue paanī ne sambhālā hogā
aaj phir us ne hathelī ko chhupāyā maañ se
aaj phir haath meñ ujrat nahīñ chhālā hogā
zindagī palkeñ bichhā de ki baḌī mushkil se
maut ne tere liye vaqt nikālā hogā