raqs karte hue maiñ tujh ko manāyā kartī

dhuul hotī to kabhī dhuul uḌāyā kartī

kisī dhāge se bañdhā aatā agar tū mire paas

minnatoñ vaale diye roz jalāyā kartī

maiñ shajar-kārī ke mausam meñ ugātī koī peḌ

aur mohabbat se parindoñ ko bulāyā kartī

pūchhtā mujh se agar koī murādeñ saarī

maiñ tirā chehra tirā naam batāyā kartī

jhiil ke sūkhte paanī ko dilāse detī

aur bārish ke liye ashk bahāyā kartī