ye jo Thahrā huā manzar hai badaltā hī nahīñ

vāqi.a parda-e-sā.at se nikaltā hī nahīñ

aag se tez koī chiiz kahāñ se lā.ūñ

mom se narm hai vo aur pighaltā hī nahīñ

ye mirī ḳhams-havāsī kī tamāshā-gāheñ

tañg haiñ un meñ mirā shauq bahaltā hī nahīñ

paikar-e-ḳhāk haiñ aur ḳhaak meñ hai saql bahut

jism kā vazn talab ham se sambhaltā hī nahīñ

ġhāliban vaqt mujhe chhoḌ gayā hai pīchhe

ye jo sikka hai mirī jeb meñ chaltā hī nahīñ

ham pe ġhazleñ bhī namāzoñ kī tarah farz huiiñ

qarz nā-ḳhvāsta aisā hai ki Taltā hī nahīñ