rizq kā jab nādāroñ par darvāza band huā

bastī ke goshe goshe se shor buland huā

matla-e-be-anvār se phūTā shoḳh tabassum kirnoñ kā

raat ke ghar meñ sūraj jaisā jab farzand huā

saada be-āmezish jazba-e-pīr faqīr karāmat kā

jis ke ism se māyūsī kā zahr bhī qand huā

avval avval shor uThā siine meñ aam tamannā kā

band fasīloñ ke gumbad meñ jo do-chand huā

dukh ko samt-shanāsā.ī dī ġham ke qurbat-dāroñ ne

dil dhārā dariyā mil kar bahra-mand huā

chaliye apne aap se chimTe rahnā to mauqūf kiyā

jab se roz ke samjhautoñ kā vo pāband huā