vo apne juzv meñ khoyā gayā hai is had tak
ki us kī fahm se bāhar hai kal kī abjad tak
khaḌī haiñ raushaniyāñ dast-basta sadiyoñ se
hirā ke ġhaar se le kar gayā ke bargad tak
uThe to us ke fusūñ se lahak lahak jaa.e
nazar pahuñch na sake us kī qāmat-o-qad tak
pata chalā ki harārat nahīñ rahī dil meñ
guzar ke aag se aa.e the apne maqsad tak
vahī asaas banā umr ke hisāboñ kī
pahāḌā yaad kiyā thā jo ek se sad tak
vahī jo dosh par apne uThā sakā ḳhud ko
nasheb-e-farsh se pahuñchā farāz-e-masnad tak