vafā ke daaġh ko dil se miTā nahīñ saktā

ye vo charāġh hai tūfāñ bujhā nahīñ saktā

mujhe kuchh aisī pilā.ī hai chashm-e-sāqī ne

surūr jis kā kabhī dil se jā nahīñ saktā

kisī kī chīn-e-jabīñ ko samajh dil-e-muztar

ḳhafā vo haiñ ki to ulfat chhupā nahīñ saktā

qafas qafas hai guloñ se sajā kare sayyād

chaman kā lutf asīrī meñ aa nahīñ saktā

kabhī is ujḌe chaman meñ bahār aa.egī

ye 'qādrī' ke gumāñ meñ bhī aa nahīñ saktā