charche har ik zabān pe husn-e-butāñ ke haiñ
unvāñ judā judā isī ik dāstāñ ke haiñ
phūloñ ke qahqahe hoñ ki fariyād-e-andalīb
donoñ hī soz-o-sāz isī gulistāñ ke haiñ
rahzan agar hai ghaat meñ kyā shikva ham-safīr
ḳhud apne rāhbar hī adū kārvāñ ke haiñ
kyā ḳhaak hoñge ishq kī manzil se āshnā
kushta har ik qadam pe jo sūd-o-ziyāñ ke haiñ
jhuk jaa.e vālihāna jahāñ ḳhud jabīn-e-shauq
ham 'qādrī' talāsh meñ us āstāñ ke haiñ