mehmāñ hai koī dam kā zamāna shabāb kā
ruktā hai kārvāñ bhī kahīñ inqalāb kā
daur-e-shaguftaganī hai ye maanā magar suno
merī nigāh meñ hai ubharnā habāb kā
e.ajāz-e-irtiqā kā tamāshā to dekhiye
zarra bhī ham-rikāb hai ab āftāb kā
sun kar vo mājrā-e-dil-e-zār bol uThe
ye vāqi.a nahīñ hai karishma hai ḳhvāb kā
be-kār 'qādrī' unheñ maiñ ne ḳhajil kiyā
kyā mil gayā jo kah diyā haal iztirāb kā