mujh ko yuuñ mujh se milā de koī
maiñ sadā duuñ to sadā de koī
maiñ ne pūchhā to hai anjām-e-vafā
ab ye Dar hai na batā de koī
aarzū ye hai ki ḳhushbū apnī
merī sāñsoñ meñ basā de koī
us ke ruḳhsār-e-shafaq-gūñ kī chamak
mere hoñToñ pe sajā de koī
jo jafā pyaar se tū ne kī hai
us ko kyuuñ kar na bhalā de koī
ḳhūn-e-dil se jo likhā hai maiñ ne
kaash ashkoñ se miTā de koī
nazreñ phir us ko uThā bhī na sakeñ
ḳhud ko itnā na girā de koī
ishq meñ bāñdh ke paimān-e-vafā
mujh ko jiine kī duā de koī
samjheñ ham zahr-e-tamannā us ko
apnī āñkhoñ se pilā de koī
aas hī TuuT na jaa.e ḳhālid
jab davā de na duā de koī