zindagī ḳhatm bhī hone pe kasak baaqī hai
ujḌe ghar meñ tirī sāñsoñ kī mahak baaqī hai
mere hamdam mujhe bedād se mahrūm na kar
dāman-e-rūh meñ zaḳhmoñ kī tapak baaqī hai
mujh ko do chaar ghaḌī aur bhī jiine diije
siskiyoñ kī abhī zaḳhmoñ meñ sanak baaqī hai
aas kī sham.a pighalne ko hai ab to aa jā
raat baaqī hai sitāroñ meñ chamak baaqī hai
maiñ kisī va.ada-farāmosh kā ā.īna huuñ
merī āñkhoñ meñ abhī us kī jhalak baaqī hai
dil-e-zaḳhmī liye baiThā huuñ azīzān-e-kirām
aao kuchh aur chhiḌak do jo namak baaqī hai