Thukrāo ab ki pyaar karo maiñ nashe meñ huuñ
jo chāho mere yaar karo maiñ nashe meñ huuñ
ab bhī dilā rahā huuñ yaqīn-e-vafā magar
merā na e'tibār karo maiñ nashe meñ huuñ
ab tum ko iḳhtiyār hai ai ahl-e-kārvāñ
jo raah iḳhtiyār karo maiñ nashe meñ huuñ
girne do tum mujhe mirā sāġhar sambhāl lo
itnā to mere yaar karo maiñ nashe meñ huuñ
apnī jise nahīñ use 'shāhid' kī kyā ḳhabar
tum us kā intizār karo maiñ nashe meñ huuñ