ḳhud apne jazb-e-mohabbat kī intihā huuñ maiñ
tire jamāl kī tasvīr ban gayā huuñ maiñ
hadīs-e-ishq huuñ afsāna-e-vafā huuñ maiñ
bhulā sake na jise tum vo mājrā huuñ maiñ
mirī sarisht hai hans hans ke zaḳhm-e-ġham khānā
ki hādsāt meñ pal kar javāñ huā huuñ maiñ
unheñ yaqīñ nahīñ mere ḳhulūs-e-ulfat kā
vafā kā apnī ye in.aam pā rahā huuñ maiñ
hamīd jis ne miTāyā hai baar baar mujhe
usī fareb-e-mohabbat meñ mubtalā huuñ maiñ