gum-shuda saa.e DhūñDhtā huuñ maiñ
lamha ban kar Thahar gayā huuñ maiñ
zāhirī shakl merī zinda hai
aur andar se mar gayā huuñ maiñ
reza reza kiyā havādis ne
apne zarrāt chun rahā huuñ maiñ
kaun dekhegā mujh meñ ab chehra
ā.īna thā bikhar gayā huuñ maiñ
vo rifāqat hai ab na vo shafqat
kitnī āñkhoñ meñ jhāñktā huuñ maiñ
siskiyāñ chīḳh aah naġhma fuġhāñ
kitne pardoñ kī ik sadā huuñ maiñ
koī munsif sazā na de lekin
qātilo tum ko jāntā huuñ maiñ