yuuñ bhaTakne meñ kī hai basar zindagī
jaise aa jā.egī raah par zindagī
ye karo vo nahīñ vo karo ye nahīñ
Toktī hī rahī umr bhar zindagī
is taraf chal diye to kisī ne kahā
us taraf aa.iye hai udhar zindagī
is taraf jā.iye us taraf jā.iye
kis taraf jā.iye hai kidhar zindagī
taultī bhī rahī Doltī bhī rahī
kuchh idhar zindagī kuchh udhar zindagī
kuchh patā to chale kuchh ḳhabar to mile
ham kidhar jā rahe haiñ kidhar zindagī
ham nahīñ jānte ye nahīñ jānte
hai ḳhabar-dar-ḳhabar be-ḳhabar zindagī
hai kahīñ saikḌoñ ekḌoñ kā mahal
aur kahīñ ek kamre kā ghar zindagī