chhoTe chhoTe se mafādāt liye phirte haiñ
dar-ba-dar ḳhud ko jo din raat liye phirte haiñ
apnī majrūh anāoñ ko dilāse de kar
haath meñ kāsa-e-ḳhairāt liye phirte haiñ
shahr meñ ham ne sunā hai ki tire shola-navā
kuchh sulagte hue naġhmāt liye phirte haiñ
muḳhtalif apnī kahānī hai zamāne bhar se
munfarid ham ġham-e-hālāt liye phirte haiñ
ek ham haiñ ki ġham-e-dahr se fursat hī nahīñ
ek vo haiñ ki ġham-e-zāt liye phirte haiñ