kaise kahīñ ki jaan se pyārā nahīñ rahā
ye aur baat ab vo hamārā nahīñ rahā
aañsū tire bhī ḳhushk hue aur mere bhī
nam ab kisī nadī kā kinārā nahīñ rahā
kuchh din tumhāre lauT ke aane kī aas thī
ab is ummīd kā bhī sahārā nahīñ rahā
raste mah-o-nujūm ke tabdīl ho ga.e
in khiḌkiyoñ meñ ek bhī taarā nahīñ rahā
samjhe the dūsroñ se bahut muḳhtalif tujhe
kyā maan leñ ki tū bhī hamārā nahīñ rahā
hāthoñ pe bujh ga.ī hai muqaddar kī kahkashāñ
yā raakh ho gayā vo sitārā nahīñ rahā
tum e.atibār us ke liye kyuuñ udaas ho
ik shaḳhs jo kabhī bhī tumhārā nahīñ rahā