nahīñ hai mujh ko ai jamshed tere jaam se kaam
jahāñ-numā hai mujhe apne ḳhush-ḳhirām se kaam
sabhī to diin va duniyā kā kaam karte haiñ
mujhe na diin na duniyā ke intizām se kaam
haram meñ shaiḳh haiñ aur dair meñ barahman haiñ
hameñ nahīñ hai unhoñ ke koī kalām se kaam
kunisht-e-dil meñ hai ik josh but-parastī kā
mujhe butoñ kī hai ḳhidmat meñ raam raam se kaam
ġharaz na kufr se kuchh hai na diin se matlab
na hai halāl se nā hai hameñ harām se kaam
sanam ke rū-ba-rū rahnā mujhe ġhanīmat hai
na sharm nañg se kuchh hai mujhe na naam se kaam
ḳhafā bhī ho ke jo dekhe to sar nisār karūñ
agar na dekhe to phir bhī hai ik salām se kaam
sunā sunā ke jo kartā hai va.az-e-husn bayāñ
paḌā hai tujh ko hamesha ye fahm-e-ḳhām se kaam
tū apne bakne se 'miskīñ' na ham se duur huā
tujhe to bakne se mujh ko hai apne kaam se kaam