tujh se ik haath kyā milā liyā hai
shahr ne vāqi.a banā liyā hai
ham to ham the ki us parī-rū ne
aa.ine kā bhī dil churā liyā hai
varna ye sail-e-āb le jaatā
shahr ko aag ne bachā liyā hai
aisī naav meñ kyā safar karnā
jis ne dariyā ko dukh sunā liyā hai
kūza-gar ne hamārī miTTī se
kyā banānā thā kyā banā liyā hai
dekhiye pahle kaun martā hai
saañp ne aadmī ko khā liyā hai
jaane vāloñ ko ab ijāzat hai
ham ne apnā diyā bujhā liyā hai
jab koī baat hī nahīñ 'āmī'
āsmāñ sar pe kyuuñ uThā liyā hai