ehtiyātan use chhuā nahīñ hai
aadmī hai koī ḳhudā nahīñ hai
dasht meñ aate jaate rahte haiñ
ye hamāre liye nayā nahīñ hai
tum samajhte ho nāḳhudā ḳhud ko
tum pe dariyā abhī khulā nahīñ hai
jis kā hal sochne meñ vaqt lage
vo mohabbat hai mas.ala nahīñ hai
baaġh par sher kahne vāloñ kā
ek misra.a harā-bharā nahīñ hai
ret hī ret hai tah-e-dariyā
ya.anī sahrā abhī mirā nahīñ hai
aao chalte haiñ ab ḳhalā kī taraf
sun rahe haiñ vahāñ ḳhalā nahīñ hai