apne hī aap meñ asiir huuñ maiñ
apne zindāñ meñ be-nazīr huuñ maiñ
ek shahr-e-ḳhayāl hai merā
apne is shahr kā amiir huuñ maiñ
baḌhtā jaatā hai zindagī kā ḳhat
ek ghaTtī huī lakīr huuñ maiñ
kyuuñ bulāte ho ab jahāñ vaalo
ek gosha-nashīñ faqīr huuñ maiñ
qarz is dil pe ulfatoñ ke haiñ
dostoñ kā karam amiir huuñ maiñ
khich ke yuuñ hī kamān meñ huuñ qaid
chhūT jā.ūñ to ek tiir huuñ maiñ
maiñ ne dekhī hai vaqt kī karvaT
mujh ko dekho ki ik basīr huuñ maiñ